romontsch | deutsch | italiano | français
nus | onn da cant | projects | shop | links | contact

Projects

Gospodi pomiluj


Primo Agosto

Emprem d'uost 2010 a S. Bernardino
* Chor viril Lumnezia
* Chor viril Ligia Grischa




Requiem en d-Moll da Luigi Cherubini

Las presentaziuns han giu liug
* Sonda, ils 24 d'avrel 2010, Tonhalle Turitg
* Dumengia, ils 25 d'avrel 2010, Baselgia S. Martin a Cuera




Il canto della creature

Bein la pli enconuschenta ovra poetica da sogn Francestg d’Assisi ei siu “Cant dil sulegl”, era numnaus “il canto della creature”. Ses plaids ensiaren atgnamein igl entir cuors dalla veta dil carstgaun en harmonia cun la natira. Sogn Francestg d’Assisi sveglia tut ils senns dils conhumans per allertar e recepir quei che schabegia ella natira. Entschevend cul Scaffider tutpussent, lauda el tuttas creatiras, il sulegl, la glina e steilas, ils elements, la carezia proximala, la mort.
Ensemen cun la poetessa Rose Aggeler, da S. Gagl, ha Peter Appenzeller (che diregia il Chor viril Ligia Grischa) cumponiu in’ovra che sebasa sin il “Cant dil sulegl” e presenta poeticamein e musicalmein cun fin sentiment il svilup digl affon sco ella natira. Accumpignai dad otg instrumentalists (flauta, oboa, clarinetta, fagot, duas violinas, viola e cello) laudan ils pli pigns la tiara cun la flora, ils utschals ed ils auters animals. Affons da ca diesch onns ensi decontan ils elements : aria, aua, fiug ed affons pli vegls las steilas. Ei suonda ina canzun dils pelegrins. Ils carschi dattan liber vau als sentiments da lur olma sco “pitir” e “resvegl”. Entginas caussas sespleigan scenicamein. Igl auditori ha pia la rara pusseivladad da persequitar il svilup dallas vuschs ellas diversas fasas da vegliadetgna.
Il chor viril ha survegniu la gronda rolla dil raquintader-descriptur. El fuorma era opticamein la rama sin tribuna. Alla fin ein d’udir ils plaids talians originals dil “Cant dils sulegl” ch’il chor viril conta da cuminonza cun ils affons e giuvenils.
Las enconuschientaschas dallas scolastas da musica, Rilana Cadruvi e Flavia Hublard, ein sepurschidas – e persuenter sun jeu leds ed engrazieivels – da mussar en las canzuns als affons e giuvenils.
L’entira ovra cuoza biebein in’ura. Per la presentaziun drova ei dabia plaz. Ins quenta cun la cooperaziun da ca. 80 affons e giuvenils. Els sto igl auditori veser bein. Vitier vegn aunc in clavazin.

Las presentaziuns han giu liug
* sonda, ils 17 da matg 2008, en baselgia s. Gions a Mustér
* dumengia, ils 18 da matg 2008, en sala da gimnastica a Glion



Stabat Mater

Sin fundament dallas fetg bunas experientschas e dils ressuns positivs dil project "Elias" che nus vein realisau igl onn 2004 ei la Ligia Grischa (ca. 80 cantadurs) sedecidia da realisar igl onn proxim in'ulteriur project communabel.

Ensemen cun il Freier Chor Zürich (ca. 80 cantadurAs) ed igl ensemble vocal CantAurora da Cuera (ca. 18 cantadurAs) - duas formaziuns che vegnan medemamein tgamunadas da nies directur Peter Appenzeller - eis ei previu da presentar l'ovra Stabat mater da Antonin Dvorák (1841-1904).

Las presentaziuns han giu liug
* venderdis sogn, ils 14 d'avrel 2006, en baselgia claustrala a Mustér
* sonda sontga, ils 15 d'avrel 2006, ella "Tonhalle" a Turitg

Ils chors vegnan accumpignai digl Orchester sinfonic da Tuirtg.

Il cumponist Antonín Dvorák ei naschius ils 8 da settember 1841 a Nelahozeves en Tschechia. Cun 16 onns va el a Prag per studiar alla scola d’organists. Il medem temps suna el la viola en differents orchesters. Cun la cumposiziun d’in himnus per chor ed orchester gudogna el 1873 in stipendi austriac. Pli tard surpren el ina professura per cumposiziun al conservatori da Prag, e 1892 daventa el directur dil National Conservatory a New York. En siu relasch musical anflein nus opras, ovras per orchester e clavazin, musica da combra ed ovras vocalas. Dvorák ei morts igl 1. da matg 1904 a Prag.

Mistica da Venderdis sogn e cant da bara
Stabat Mater ei ina dallas ovras las pli impressiunontas dalla litteratura da baselgia. El center stat adina la Mater dolorosa, la mumma dolorusa sco representanta dalla carstgaunadad entira. Il maletg dalla Mater dolorosa ha buca mo inspriau ils cumponist, mobein da tut temps era picturs e sculpturs. 

Ils onns 1876/77, il temps che Antonin Dvorák lavura vid il “Stabat Mater” (op.58), veva l’umbriva dalla mort priu possess dad el e da sia famiglia. Mo plaun plaunsiu racolta el las arbagias da sia lavur sco organist a Prag, e tras malsogna e disgrazia piarda Dvorák ses treis affons premnaschi. La finala ei quella tresta experientscha il motiv principal per duvrar il text tradiziunal dil “Stabat Mater” sco basa per sia ovra grondiusa, ed aschia era exprimer siu cordoli suenter la  mort da ses affons.

La premaudiziun dil “Stabat Mater” ha giu liug 1880 a Prag. Fetg spert ha l’ovra era anflau la via en ulteriurs marcaus dall’Europa ed America. 1884, suenter la presentaziun a Londra, ha ella era gidau d’infirmir la simpatia denter il cumponist tschec ed il mund engles/anglosaxon.





Elias

Igl oratori il pli impurtont dil temps dalla romantica. Ina presentaziun musicala impressiunonta dallas staziuns da veta digl emprem profet ed annunziader dil cristianissem. In orchester sinfonic accumpogna il chor che conta per part en tochen otg vuschs. Las singulas scenas ein cumponidas a moda varionta e dramaticamein fetg intressantas. In punct culminont dall'ovra da Mendelssohn che ha influenzau duront sia cuorta veta la scena musicala tudestga per silmeins in tschentaner.

Project
La structura digl oratori pretenda dils participonts ina gronda voluntad interpretatorica. Dils cantadurs/dallas vuschs pretenda l'ovra fetg bia. L'ovra damonda in grond chor. Savens ha in chor mischedau buca avunda vuschs dad umens. Egl 'Elias' sa la Ligia Grischa tschentar accents impurtonts. Accents ch'ins ha entochen oz aunc buca udiu en quella fuorma. In'ulteriur augment da qualitad vegn contonschius cun l'integraziun d'in ensemble solistic (cantAurora), ed a Turitg d'in chor d'affons. Ozildi sto l'ovra vegnir presentada savens. Il messadi ei fetg actuals!

Ils participonts
Freier Chor Zürich
Chor d'oratori cun ca. 80 commembers. Fundaus e menaus dapi 1989 da Peter Appenzeller. Presentaziun dils oratoris enconuschents tochen el temps dad oz. Da bia cant a-capella.

cantAurora
Ensemble vocal. Dapi 1997 sut la direcziun da Peter Appenzeller. Normalmein 16 commembers (quater per vusch). Lavura savens cun litteratura a-capella fetg pretensiusa.

Chor d'affons
Chor ad hoc. Principalmein cun scolarAs dalla scola Rudolf Steiner Turitg.

Glarner Musikkollegium
Ensemble renconuschiu dapi decennis. Fundatur e menader: Dr. Rudolf Aschmann. Litteratura: musica baroca concertanta. Igl ensemble ei fetg dumandaus sco orchester accumpignont.

Solists
Culs solists Dorothea Frey, sopran, Regina Jacobi, alt, Hubert Saladin, tenor e Michel Brodard, bass, eis ei stau pusseivel d'engaschar quater cantadurs da concert ch'ein fetg enconuschents en Svizra ed egl exteriur.

Chor viril Ligia Grischa
Il Chor viril Ligia Grischa exista dapi 1852. Actualmein dumbra el ca. 80 cantadurs activs ch'ein per la pli gronda part da casa en Surselva.
Il chor ei vegnius fundaus cun la finamira da promover il cant romontsch viril e da representar quel allas fiastas da cant cantunalas e federalas. Quei ha la Ligia Grischa, sco ch'il chor vegn per regla numnaus, fatg regularmein dapi sia fundaziun. Dall'emprema fiasta da cant federala ha la Ligia Grischa priu part igl onn 1862 a Cuera, dalla davosa igl onn 2000 a Martigny el Valleis.
Ils emprems siat decennis ei il chor viril Ligia Grischa vegnius tgamunaus da dirigents amaturs, per regla da scolasts. Pér naven da 1924 stat el sut la direcziun da musicists da professiuna. Igl emprem ei staus Robert Cantieni, il cumponist dalla renomada canzun «Chara lingua da la mamma». Lu suondan Hans Lavater, Turitg; Walter Aeschbacher, Berna/Basilea; Ernst Schweri, Cuera, e Gion Giusep Derungs, Surcasti/Cuera. Sut tut quests dirigents professiunals ha il chor giu biars gronds success a caschun da concerts e fiastas da cant, segi quei federalas, cantunalas ni districtualas.
Actualmein conta il chor sut la direcziun da Peter Appenzeler, oriunds da S.Murezzi, sesents a Feldmeilen/Turitg.

Peter Appenzeller
Naschius 1955. Studi da musica a Turitg cun diploms en musica da scola II, clavazin (Schweizerischer Musikpädagogischer Verband), cantor (Jakob Kobelt), menader d'orchester (Olga Géczy). Scolaziun supplementara en Svizra ed egl exteriur.
Dapi 1976 menader da differents chors. 1979-1988 fundaziun e formaziun dalla 'Kantorei Neumünster Zürich'. 1982-1991 menader digl 'Engadiner Kammerchor St.Moritz'.
Activitad actuala: scolast da musica alla scola Rudolf Steiner a Turitg. Direcziun dil "Freier Chor Zürich", direcziun digl ensemble vocal 'CantAurora', Cuera, directur dil chor viril Ligia Grischa, Glion. Adina dapli activitads sco cumponist e referent per pedagogia da musica.


Unbenannte Seite
update: 02.10.2017
powered by
nervenschoner.ch