Oz stat la Ligia Grischa sut la direcziun da Christoph Cajöri, carschius si a Tusaun e sesents a Baden/AG. La Ligia Grischa dat a ses commembers la caschun d’emprender, ultra dallas canzuns tradiziunalas romontschas, era ovras musicalas pli pretensiusas che san buca vegnir cantadas en mintga chor d’in vitg. Siu program presenta il chor a caschun dils concerts annuals e magari era per occurrenzas specialas. Cheu in cuort sguard anavos sillas producziuns dils davos onns. Beinvegnius el chor viril Ligia Grischa ei scadin che ha plascher dil cant e ch’ei promts da far part stediamein da 15 tochen 20 exercezis ad onn. Quels han per regla liug naven dalla fin october entochen miez matg mintgamai la dumengia sera dallas 19:00 tochen las 22:00 en casa da scola a Glion.

Ils emprems onns da sia existenza ha la Ligia Grischa surtut giu da cumbatter cun problems organisatorics: nua, cu e co far ils exercezis da cant, essend ch’ils cantadurs eran spatitschai lunsch entuorn. Rimnar cantadurs d’in vast contuorn era da gliez temps ina caussa stentusa. Quei problem ei staus actuals tochen che la lingia dalla viafier da Cuera a Glion ei vegnida aviarta igl onn 1903 e 1912 quella da Glion a Mustér. Da lu naven ei il viadi a Glion allas emprovas da cant vegnius levgiaus grondamein pils cantadurs da pli lunsch. Aunc bia pli sempels ein ils viadis daventai il mument ch’ina gronda part dils commembers ha giu in agen auto. Ils emprems siat decennis han dirigents amaturs dirigiu il chor viril Ligia Grischa, per regla scolasts. Naven digl onn 1924 stat el sut la direcziun da musicists professiunals. Igl emprem ei staus Robert Cantieni, il cumponist dalla renomada canzun «Chara lingua da la mamma ». Ad el ein suandai Hans Lavater, Turitg, Walter Aeschbacher Berna/Basilea, Ernst Schweri, Cuera, Gion Giusep Derungs, Surcasti/Cuera e Peter Appenzeller, Feldmeilen/Sogn Murezi. Sut tut quels dirigents professiunals ha il chor giu biars gronds success a caschun da concerts e fiastas da cant, seigi quei federalas, cantunalas ni districtualas.

Il Chor viril Ligia Grischa ei vegnius fundaus igl onn 1852 sin iniziativa dil plevon ser Gion Martin Darms da Flond, da gliez temps plevon a Castrisch. Ils emprems statuts dil chor ein vegni suttascrets ils 6 da fevrer 1853 a Sagogn, e quei da 24 commembers dallas vischnauncas da Castrisch, Duin, Flem, Flond, Glion, Luven, Pitasch, Riein, Sagogn, Schnaus, Sevgein e Valendau, pia dalla regiun reformada dalla Foppa. Gl’emprem quart tschentaner ei il chor seformaus quasi sulettamein da cantadurs dallas vischnauncas numnadas. Naven dil secund onn d’existenza ein aunc cantadurs da Trin vegni vitier. Intent dalla fundaziun eis ei stau da promover il cant romantsch viril e da representar quel allas fiastas da cant cantunalas e federalas. Quei ha la Ligia Grischa – aschia vegn il chor vegn per regla numnaus – fatg regularmein dapi sia fundaziun. L’emprema fiasta da cant federala ha la Ligia Grischa visitau gl’onn 1862 a Cuera, la davosa ei stada 2022 a Gossau.